Tekst achterflap

KOKEN MET KEEN

Roelof Keen zien mam kun geweldig lekker koken. Zie hef heur kinder – zeker op dit gebied – schromelijk verwend en zie hef de liefde veur de keuken op heur kroost overbracht. Met recht kan dankzij mam Keen dan ok zegd worden ‘Koken. . . zit de Kenen in de genen’.
Maor der is maor ien van de Kenen, die zien lekkerste gerechten bij mekaar gaard en opschreven hef. Dat de rest van de mensheid zuchzölf en zien umgeving ok verwennen kan.

Denk niet dat dit boek een dreuge opsomming is van ingrediënten en stappenplannen um tot een goed risseltaot te kommen.

Roelof Keen hef in hiel Drenthe en wiede umgeving lezings geven. Zien verhalen gaot er overal in as Gods woord in olderlingen. En Roelof hef ok nog ies de gave um zien woorden op een meer as plezerige menier over een zaal vol volk oet te strooien. Zo is het ok met dizze bundel. Dit is een echt ‘Keen-boek’. Op een prettige menier en vol humor beschref Roelof Keen waor e zien gerechten opdaon hef; in Drenthe, Japan, Gambia, Frankriek, Zuud-Afrika, Griekenland, bij femilie enz., waornao de betreffende smullerij helder, dudelijk en weer vol humor op de riege zet wordt. Je komt dan zinnen tegen as ‘Al gauw komp
der een beetie broenachtig broes op de soep; gewoon zitten laoten, giet vanzölf vort’ of ‘De kiprollades mugt op zwemles as de suker oplöst is’. En nao het snieden van de siepels en Spaanse pepers kriej as raod: ‘Met de sloffe doek de traonen oet je ogen wrieven’.
En zoas elk gerecht wat hebben möt um het écht hielemaol af te maken, zo is het ok met dit boek. Roelof Keen zien kammeraod Gerrit Pomp hef – net as in een veurige bundel van Roelof – weer zörgd veur de illustraties. De beide manlu vuult mekaar hielemaol an en hebt eenzölfde gevuul veur humor. De illustraties past dan ok bij dit boek as zolt bij een ei.
Koken met Keen is gewoon een hiel lekker boek. In dubbel opzicht: um te lezen én um de lekkerste maoltied op taofel te kriegen. En oj Roelof Keen een opschepper vindt in de letterlijke of figuurlijke betiekenis moej zölf maor bepaolen.

Jan Germs

Details